Cebu - Patay diha-diha ang usa ka habal-habal drayber human kini giatangan sa dalan ug gipusil sa ulo samtang paingon na untang mopauli gikan nitambong og disko sa barangay Lamacan lungsod sa Sibonga kagahapon sa alas 3:30 sa kaadlawon.
Ang biktima mao si Emedio Celebrado, 29, nagpuyo sa barangay Basak samtang ang suspek wala pa ma-ilhi ug padayon pang gipangita sa kapulisan sa paghimo ning balita.
Matud ni PO2 Niño Laurence Ibo sa Sibonga Police dihang nahinabi sa Banat News ang biktima gikan kini nitambong og disko sa maong lugar nunot usab sa tinuig nga kapistahan niini.
Apan sa iyaha nang pagpauli nianang pagka-kaadlawon sakay sa iyang motorsiklo giatangan kini sa ngitngit ug mingaw nga bahin sa maong lugar ug gipara dayong gidul-itan sa pagpusil sa luyong bahin sa ulo.
Ang bala gituohang nalubong sa ulo ug wala makalapos nga miresulta sa hinanali niining kamatayon.
Ang kapulisan padayun pang nag-imbestigar pag-ila sa suspek ug sa motibo sa krimen sanglit wala pay bisan usa ka saksi nga mihatag og dugang impormasyon may labot sa suspek.
Wala say nadawat nga report ang kapulisan kun duna bay gikaaway sa diskohan o ba kaha may labot sa iyang trabaho isip habal-habal drayber ang biktima. – BANAT NEWS