Obama manumpa karon

Cebu - Gipangandaman sa bag-ong Presidente sa Estados Unidos Barack Hussein Obama ang iyang pagpanumpa karong adlawa isip unang itom nga Pangulo sa labing bantugang nasud sa kalibotan.

Sa iyang panumpa ipatong ni Obama ang iyang tuong kamot sa Biblia ni Abraham Lincoln aron atubangon niya ang dakong hulga ug hagit sa iyang katakos ug abilidad sa liderato.

Si Obama , 47, walay kahadlok nga moatubang sa dagkong suliran nga naghulga sa katibuk-ang Amerca nga nakapakurog usab sa tanang nasud sa kalibotan gumikan sa dili kalikayang epikto sa midahiling ekonomiya sa maong nasud.

Ang mga tigpaniid nagkanayon nga ilang bantayan pag-ayo ang inabtik nga mga paagi ni Obama aron makalingkawas ang Amerika gikan niining misukarap nilang ekonomiya.

Si Valerie Jarrett kinsa maoy mahimong senior adviser ni Obama sa White House ug nasinati pag-ayo sa pagkatawo ni Omaba sulod na sa 18 ka tuig nagkanayon nga “he never lets fear of failure prevent him from taking a calculated risk”. - Banat Editors’ desk (BANAT NEWS)