CEBU - Gikustodiya sa kapulisan sa dakbayan sa Sugbu sugod kagahapon sa buntag ang usa ka bagitong police nga nagpailawom sa Field Training Program ug nadestino sa Central Beat sa CCPO human malutsan og warrant of arrest gumikan sa kasong estafa.
Si PO1 Ador Bacalso taga sitio Timbacot, barangay Putat, lungsod sa Tuburan nalutsan og warrant of arrest nga giisyu ni Regional Trial Court Judge Antonio Marigomen sa dakbayan sa Bogo nga gipetsahan niadtong Hunyo 6, 2007.
Kini tungod sa kasong estafa nga gipasaka niadtong Agosto 10, 2008 sa Agro-Industrial Fist Rural Bank Inc. Bogo- Cebu Executive Office tungod sa pasangil nga wala niini giuli ang nakolektang P100,000 nga mga death aid benefits sa ilang mga miyembro samtang siya pa ang program officer sa maong bangko.
Ang pangulo sa Cebu Provincial Police Office director, Sr. Supt. Carmelo Valmoria nagkanayon nga automatic nga dismissal ang silot kang Bacalso tungod niini.
Gusto masuta ni Valmoria kun diin nikuha’g clearances ug giunsa pagkahitabo nga nakalusot kini sa background check sa wala pa kini dawata pagka-police. (BANAT NEWS)