CEBU - Patay diha-diha ang usa ka lalaki human kini napahimungtan sa kalagot sa usa sa duha ka tawo sa duha ka batang ilaha untang dunggabon kagahapon sa kaadlawon sa dalan Leon Kilat, barangay Kalubihan ning dakbayan.
Si Rodulfo “Atoy” Tamara,35, nga taga sitio Culveta II barangay Mambaling naantimano gyud sa kutsilyo diha sa kalawasan dihang maoy gipahimungtan sa suspek nga si Mario Nobleza, Jr. ug kauban niining Jomer Espino.
Nasuta nga ang mga suspek may gigukod nga batan-ong nag-edad og 13 ug 15-anyos nga nagtungha sa City Central Elementary School niadtong tungura.
Sa imbestigasyon sa Homicide Section ang duha ka menor de edad naglingkod daplin sa karsada sa nahisgutang lugar ug kalit giduol sa mga suspek ug dayong suway og dunggab kanila.
Apan ang duha nga nakamatikod sa peligro nakalikay ug daling nakadagan.
Naatol hinuon nga naglakaw sa maong dapit ang biktimang si Tamara ug mao hinuoy gipahimungtan sa duha ug way daghang pangutana gidiretso kini og hansak sa onse pulgadas nga kutsilyo ni Nobleza.
Wala na kapiog ang biktima tungod sa kadaghan sa dunggab nga iyang naangkon.
Hinuon wala makaipsot ang mga suspek dihang naatlan nga may mga nag-roving nga kapolisan nga pinanguluhan ni PO2 Remos Saraza Goco ug PO1 Meonik Lim Cabañero.
Ang biktima gitabang sa mga sakop sa Emergency Rescue Unit Foundation apan patay na kini. (BANAT NEWS)