Patrol car gidumog sa taxi polis angol

Cebu - Usa ka polis ang naangol human ang patrol car nga gimaneho niini gibanggaan og taxi didto sa barangay Dumlog, dakbayan sa Talisay, kagahapon sa kaadlawon.

Ang biktima mao si PO1 Ernani Bureros kinsa maoy drayber sa patrol car .

Kauban niya sa maong sakyanan sila si   PO1 Jonathan Calabroso, PO1 Ray Monito Mesa, PO1 Francisco Ricafort, PO1 Boyet Nuique ug PO1 Junrey Digao kinsa pulos usab nangabun-og ang kalawasan.

Samtang ang drayber sa taxi nga mibangga sa sakyanan sa kapolisan mao si Roel Duazo, nga taga Consolacion.

Sa pasiunang imbestigasyon nga gihimo ni PO1 Aquiles Cabando nasuta nga sila si PO1 Bureros nagpadagan sa ilang patrol car didto sa barangay Dumlog gikan sa barangay Biasong kabahin sa ilang naandang pagpatrolya, dihang kalit lang silang gidumog sa taxi nga gimaneho ni Duazo nga nakapalumping sa sira sa tuong pultahan sa maong sakyanan nga maoy nakapaangol ni PO1 Bureros.

Gihatod dayon si Bureros sa Chong Hua Hospital, uban sa iyang mga sakay nga pulos usab nangabun-og ang lawas.

Samtang ang drayber sa taxi nga si Duazo nagpabilin pa sa kostudiya sa Talisay City Traffic Division sa barangay Tabunok. – BANAT NEWS