Driver sa 'kolorum' gipatay sa sikyu

Cebu - Patay ang usa ka driver sa rent a car human kini pusila sa security guard on duty sa Mactan Cebu International Airport diha sa arrival section sa maong tugpahanan kagahapon sa buntag.

Ang biktima mao si Cerafin Gesta alyas "Raprap" 33, taga lungsod sa Compostela ug driver sa usa ka kolorum nga rent-a car kinsa giingong namugos nga anha moestambay sa maong dapit.

Samtang ang suspetsado mao si Jessie Jumadiao, 33, taga barangay Omapad dakbayan sa Mandaue sakop sa Mustang Security Agency nga nadestino sa MCIAA.

Matud pa sa suspek sa pakighinabi sa Banat News alas 6:05 kagahapon sa buntag iyang gibadlong si Gesta nga dili mag-estambay sa arrival section tungod sa polisiya sa MCIA management.

Apan giingong nasuko kini ug misukmag kaniya hinungdan sa ilang pagsinukliay ug kinumo, tungod kay mas makamaong mangamot ang biktima nakulatahan gyud ang suspek.

Tungod niini gibunot ni Jumadiao ang kalibre .9mm nga service firearm dayong pusil ni Gesta kinsa niadtong tungura nagdali nang makapalayo ug naigo sa dapidapi.

Apan imbes nga mopadayon sa pagpalayo gikatahong mibalik kini kang Jumadiao maong giusban pagpusil diha sa iyang ulo ug dapidapi hinungdan nga nadala kini sa Mactan Doctors Hospital diin kini makabsi sa kinabuhi.