Cebu - Giluba ang usa ka mananagat sa iyang kaubang mananagat human sila nag-inom diha sa Sitio Looc, barangay Poblacion, Argao niadtong miaging adlaw alas 10 pasado sa gabii.
Ang biktima giila nga si Arnulfo Rufo Famat, 37, ug molupyo sa maong lugar ug ang gipasanginlang nanunggab mao si Raymond alyas “Cocoy” Allawan.
Matud pa ni PO1 Bernie Lao sa Argao Police Station nga ang biktima uban sa iyang mga higala nga sila si Michael ug Albert nga nag-inom sulod sa panimalay ni Maximo Allawan nga amahan sa suspetsado.
Dugang pa ni PO1 Lao nga ang balay diin sila nag-inom gibato hinungdan nga migawas ang tag-iya sa panimalay uban sila si Michael ug Albert diin nahibilin ang biktima ug ang suspetsado.
Pipila ka oras ang milabay sa ilang pagbalik ilang nakita ang biktima nga samdan ang ibabaw’ng bahin sa iyang tiyan, tuong bahin sa iyang bukton ug iyang paa. Samtang si Cocoy wala na nila makit-i.
Ang biktima gidala pagdali sa Isidro Kintanar Memorial Hospital apan gideklarar nga patay na kini.
Nahipos sa kapolisan sa Argao ang tsinelas nga blue ug ang duguan nga sundang nga gituhoang gigamit sa pagpatay ni Famat.
Ang suspek nga misibat gidudahang nagtagotago sa bukirang sa maong lugar. – BANAT NEWS