Polis angol sa bangga

CEBU - Nakalingkawas sa tinong kamatayon ang usa ka polis human usab gidaro ang iyang motorsiklo sa laing motorsiklo kagahapon sa alas tres sa kadlawon diha sa may Highway Talamban Villa Leyson Subdivision.

Nalandig sa Cebu City Medical Center (CCMC) si SPO4 Carlos Salomon, Chief Investigator sa Talamban Police Station human makaangkon og bun-og ug pangos sa nagkadaiyang parte sa iyang lawas.

Samtang ang nakadasmag mao si Geraldine Te, taga Villa Del Rio Talamban kinsa pabilin pang gawasnon.

 Si PO3 Armando Bañoc, Traffic Investigator sa Cebu City Traffic Division nga gikahinabi sa Banat News miingon nga si SPO4 Solomon gikan kini sa night patrol.

Pag-abot sa nahisgutang lugar kalit lang kining gidumbol sa laing motorsiklo nga gimaneho ni Geraldine hinungdan nga maayong pagkalimbuwad niini.

Hinuon si SPO4 Solomon gidali kini pagdala sa iyang kaubang pulis diha sa tambalanan, apan ang suspek nakaikyas apan dunay mga nakaila kaniyang mga saksi ug gitug-an ngadto sa mga polis. – BANAT NEWS