CEBU - Usa ka semana human iparollback ngadto sa P6.50 gikan sa P7.50 ang plitehan sa tricycle sa dakbayan sa Talisay, gisugyot na usab sa kosneho nga pasawmon pa kini ngadto sa P6 .
Sa ilang regular nga sesyon niadtong Martes sa buntag, gisugyot ni konsehal Edward Alesna nga hangyoon nila si Mayor Socrates Fernandez nga mopagawas og executive order nga pakubsan ang plitehan sa tricycle ngadto sa P6.00 tungod sa sunod-sunod nga pagkunhod sa presyo sa gasolina.
Miingon si Alesna sa konseho nga kung ilang amendahan pag-usab ang ordinansa sa plitehan sa tricycle,nagkinahanglan na usab kini og taas nga panahon kay moagi pa kini og daghang estokada diha sa konseho una kaaprobahi. .
Si Alesna, kinsa maoy chairman on council committee on Laws ug mimugna sa tricycle fare ordinance, miingon nga iya nang nahimamat ang mga tricycle driver ug operator ug gipahibawo kanila ang bahin sa bag-ong plitehan.
Apan ang mga drayber nga hingtungdan giingong wala malipay ug gani gibaharan pa si Alesna nga diuli na nila botohan sa umaabot nga election.
Hinuon wala kini makapabahag sa ikog ni Alesna ug gani labi ka siyang miisog sa pagpaugos nga mapatuman gyud ang plitehan nga P6 alang-alang sa interes sa kinabag-ang tawo sa Talisay.
Sa pagkakaron gipaabot nalang sa konseho ang reaksyon ni Mayor Fernandez bahin ning maong isyu. – BANAT NEWS