3 ka polis nag-jogging gidasmagan

CEBU - Tulo ka mga polis nga apil sa 62 ka mga sakop sa Philippine National Police nga nag-jogging daplin sa karsada nalandig sa tambalanan human gipangdaro sa naghaguros nga pribadong sakyanan alas 5 kagahapon sa kaadlawon sa eskina Escario ug Gorordo, barangay Camputhaw, ning dakbayan.

Nakalingkawas hinuon sa tinong kamatayon silang SPO2 Enrico Iway, sakop sa Mandaue Police Station 6, SPO2 Miguelito Romano sa CCPO Medical Team ug SPO3 Joel Suelo, sakop sa Cebu City Mobile Group (kanhi Security Service Group).

Silang SPO2 Iway, SPO2 Romano ug SPO3 Suelo kabahin sa 62 ka mga polis nga nag-jogging isip tipik sa ilang kursong Senior Leadership and Supervisory Course sa Regional Training School sa barangay Apas.

Si PO3 Armando Bañoc, traffic investigator sa Cebu City Traffic Division, nagkanayon nga ang midasmag sa tulo ka polis mao ang usa ka Mitsubishi Space Wagon nga nagtangag og plakang UJA-558 nga gimaneho ni Antonio Angelito Rosello, 43, taga sitio San Antonio, barangay Apas, ning dakbayan.

Matud pa ni PO3 Bañoc nga si Rosello niangkon nga nakatulog sa iyang kahubog samtang nagmaneho sa iyang sakyanan gikan nag-inom sa downtown area ning dakbayan.

Gikatahong padulong na untang mopauli si Rosello sakay sa iyang Space Wagon sa dihang iyang nadaro ang mga nag-jogging nga mga polis.

Nilang tulo ka mga polis, si SPO2 Romano ug SPO3 Suelo nakaangkon lamang og mga pangos sa ilang kalawasan.

Apan si SPO2 Iway nakaangkon og kadaot sa iyang hawakan.

Silang tulo ka mga polis gipangdala sa Perpetual Soccour Hospital. Si SPO2 Iway nagpabilin pa sa ospital sa pagkakaron tungod sa kadaot sa iyang hawakan.

Ang tag-iya ug nagmaneho sa sakyanan nga nakadasmag nga si Rosello positibo sa liquor test nga gipahigayon sa Cebu City Medical Center. Gidala kini sa Traffic Section tungod sa kahubog.

Hinuon gi-release si Rosello sa kustodiya sa Traffic Section human nagkasabot kini ug sa mga polis nga iyang nadasmagan.

Si Manuel Tagaan, sakop sa City Traffic Operations and Management (Citom) nga nakahupot sa rekord sa kaso ni Rosello, nagkanayon nga adunay amicable settlement nga nakab-ot sa drayber ug sa mga polis. – BANAT NEWS