Rollback sa plite gi-ukon-ukon bisan sa rollback sa petrolyo

CEBU - Nag-ukon ukon pa gihapon ang pipila ka mga kahugpungan sa mga drayber ug operator pag-rollback sa pletihan nunot niining dakong pag-us-os sa presyo sa petrolyo sa nasud.

Kini hangtud di nila masigurong stable na ang presyo ug di na subling mosaka ug padayong magkabarato ang presyo sa lana sa world market.

Si Roy Opura, chairman sa Northbound sa Nagkahiusang Drayber sa Sugbu mitug-an sa Banat News nga bisan sa P5 nga rollback sa “big three” oil companies dinhi dako pa gihapon ang kulang nila sa publiko ug maisip nga nag-overprice pa gihapon sila.

Si Opura nagkanayon nga base sa presyo sa lana niadtong bulan sa Nobiyembre sa milabay’ng tuig nagpresyo ra kini og 97 dolyares matag barrel sa world market ug ang presyo sa krudo dinhi P38 matag litro lang.

Sa pagkakaron kapin 50 dolyares nalang ang presyo sa matag barrel sa petrolyo sa world market, P41 pa gihapon ang matag litro sa mga gasoline stations dinhi.

Sumala pa ni Opura hangtud nga di magmakiangayon ang mga big players sa presyo subay sa presyo sa world market sa ilang produkto sa local market apektado pa gihapon ang mga presyo sa nag-unang palaliton.

Matud pa niya di angayang himuong basehanan lang ang pletihan sa kahimtang sa publiko karon kundili ang presyo   gyud sa petrolyo ug kung gisunod ba gyud kini sa mga oil companies.

Hinuon mipadayag si Opura nga makigtagbo siya sa mga opisyales sa grupo aron tukion ang posibilidad nga pagkunhod sa minimum fare ug kung angayan na bang ipatuman kini.

Nabalaka ang transport sector nga mokalit og saka ang presyo sa lana gumikan sa nagsingabot nga Pasko tungod sa mga nasud nga bugnaw ang klima ug magkinahanglan og mas daghang supply niini.

Si Clifford Niñal, presidente sa CITRASCO nalipay sa pag-us-os sa presyo sa lana apan susama sa Nadsu di pa kini makasigurong stable na ba kini.

Matud pang Niñal sa iyang opinion mahimo na hinuong mopatuman og P.50 provisional fare reduction gikan sa P8 ngadto na sa P7.50 apan kini iyaha pang ikunsulta sa mga sakop sa board nga gilangkuban sa mga operators ug drivers sa ilang pundok.

 Miangkon hinuon kining nangalipay og dako ang mga drayber sa P5 nga rollback sa krudo ug P2 sa gasolina apan ang mga operator wala makatilaw niini sanglit wala man sila mopataas pa sa ilang abang sa sakyanan.

Silang mga operators maoy mogasto sa maintenance sa maong mga pasaheroan ug hangtud nga di moubos ang presyo sa mga piyesa ug uban pang gikinahanglan sa mga sakyanan gihulagway nilang di mamahimong patas ang fare reduction bisan na may oil price rollback. – BANAT NEWS