Krimen sa Talisay mikunhod

CEBU - Mikunhod ang mga krimen sa dakbayan sa Talisay gikan sa Enero hangtod sa Agosto niining tuiga, kun itandi sa krimen sa susamang period sa milabay'ng tuig.

Subay sa rekord, mikabat sa 571 ang gidaghanon sa krimen sa tuig 2007 samtang 468 ra niining tuiga o mikibra kini og 103.

Sa index crime may 403 nga nalista niadtong 200, samtang 281 niining tuiga o natibhangan og 122.

Sa non-index crime , may 168 sa tuig 2007, samtang 187 ning tuiga o misaka og 19.

Ang index crime maoy mga krimen nga naglangkob sa rape, murder, homicide, physical injury, robbery ug theft.

Samtang ang non-index crime maoy mga krimen nga sama sa illegal possession of firearms, illegal drugs, malicious mischief ug gambling.

Sa tuig 2007 matag buwan mikabat sa 39.79 porsiyento ang mga krimen nga natala sa listahan sa kapolisan, samtang niining tuiga 32.61 porsiyento ra ug mikunhod kini og 7.18 porsiyento.

Sa tuig 2007 mikabat sa 93 ka krimen ang wala masulbad apan niining tuiga 47 ra.

Base   usab sa talaan sa kapolisan, ang muder, physical injury, rape ug robbery kasagaran mahitabo gikan sa alas 6:00 sa gabii hangtod sa alas 9:00 sa gabii samtang ang homicide kasagaran mahitabo sa alas 9:01 sa buntag ngadto sa alas 12:00 sa tungang gabii ug ang theft kasagarang mahitabo sa alas 12:01 sa tungang gabii hangtod sa alas 3:00 sa kaadlawon.

Sumala sa kapolisan, ang theft kasagaran mahitabo sa adlaw nga Martes, samtang sa murder ug robbery sa Biyernes, ang homicide ug physical injury, mahitabo sa Sabado. – Banat News