Mibuto ang bukton sa usa ka trabahador sa konstraksyon nga nakuryentehan sa mainline sa CEBECO-III samtang namanday kini sa usa ka balay didto sa barangay Luray-II siyudad sa Toledo kagahapon sa alas 11:00 sa udto. Ang nakuryentehan mao si Joel Aban, 30, ulitawo, nga taga Luray II.
Matud ni PO1 Celso Maquidato sa Toledo City Police dihang nahinabi sa Banat News nga ang biktima nag-ayo sa balay sa iyang silingan nga si Albina Mahidlawon.
Dihang mikatkat siya sa ibabaw aron ayuhon ang buslot sa atop sa balay mihana og katumba ang damba nga iyang gilatayan ug sa paningkamot nga dili siya mahagbong sa yuta, migunit siya sa labing dakong linya sa kuryente sa CEBECO.
Tungod sa kakusog sa bultahe sa kuryente sa maong linya, nalabay ang biktima sa yuta ug mibuto ang tuong bukton niini.
Gawas sa dakong samad sa iyang bukton, nangapaso pa ang nagkalainlaing bahin sa iyang lawas uban sa mga bun-og ug pangos sa iyang pagtugpa sa yuta.
Ang biktima gihatod dayon ngadto sa Toledo City District Hospital apan gumikan sa katalandugon sa kahimtang niini, gibalhin kini ngadto sa hospital sa dakbayan sa Sugbo.