Kapakyas nga ma-ISO ang CCMC maoy rason nga ibaligya na kini

Desidido na si Mayor Tomas Osmeña nga ibaligya ang Cebu City Medical Center (CCMC) human sa 47 ka tuig nga pagdumala sa dakbayan niini.

Ang kalisod paghimo og kausaban sa nahisgutang tambalanan maoy gitumbok nga rason sa mayor sa iyang nakab-ot nga desisyon partikular na niini ang mga empleyado nga giingong walay laing gilantaw kun dili ang ila ra usab nga kaugalingon.

“They are the problems, it’s very hard to do reforms at CCMC, they have a culture of thinking of themselves,” sumala ni Osmeña.

Matud sa mayor nga siya niadto pang tuig 2001 nagsige og pasidaan sa mga kawani niini apan giingong walay maayong kalamboan nga nahitabo sa CCMC.

Gusto unta sa mayor nga ma-accredit ang City Hospital sa International Organization for Standardization (ISO) nga maoy basehanan nga ang serbisyo publiko sa maong tambalanan maila.

Gani nikuha ang kagamhanan sa dakbayan sa serbisyo sa usa ka foreign consultant kaniadto alang sa maong katuyuan apan  nadismaya si Osmeña kay pakyas ug wala makakuha sa standards ang CCMC hinungdan nga kini wala makapasar sa ISO.

“They have been given so many warnings since 2001, you get your ISO, they can not get an ISO, they are not even close even if we put a foreign consultant there, wala lang gihapon,” dugang pamahayag sa          mayor.

Nasayran nga ang University of San Carlos (USC) maoy usa sa giduol sa City government alang sa pagpalit sa CCMC apan nasayran nga ang tag-iya sa University of Cebu (UC) nga si Gus Go, giingong interesado usab nga mopalit sa nahisgutang tambalanan.
 Giklaro hinuon ni Osmeña nga ang pagbaligya sa City Hospital ipaagi sa bidding subay sa tukma nga proseso.
 Usa sa pangayuon unyang kundisyon sa mayor sa makapalit sa CCMC mao ang pagtunga og bayad sa retirement benefit sa mga empleyado niini.

Gitataw ni Osmeña nga mas daghan ang makabenipisyo kung ipasakop sa Philhealth ang mga kabus sa siyudad itandi sa pagmentinar sa maong tambalanan.

Ang kagamhanan sa dakbayan giingong mogasto og labing minos P160 milyones matag tuig pagpadagan niini sa CCMC.