Usa sa duha ka mga minor de edad nga mga suspetsadong tulisan nasikop sa kapolisan human kini makabiktima og duha ka babaye didto sa M.C. Briones Avenue, barangay Guizo, dakbayan sa Mandaue sa miaging gabii.
Ang nadakpan mao si Eric (bansagon gipugngan sa Banat News) 16 anyos, ug ang nakaeskapo giila lang sa iyang angga nga “Goriao” kinsa pulos taga Subangdaku sa maong dakbayan.
Si PO3 Dante Wenceslao sa Presinto 1 sa Centro Police Station nga nahinabi sa Banat News miila sa gitulis nga mga biktima nga mao sila si Michelle Jean Abringue, 21, ug Llana Heyrosa, 23, nga pulos dalaga ug mga lumolupyo sa barangay Labogon sa maong dakbayan.
Si PO3 Wenceslao miingon nga naglakaw ang mga biktima sa maong dapit dihang kalit lang mitumaw ang mga suspetsado nga nagdala og kutsilyo ug giagbayan niini si Heyrosa ug dayon mipahibalong tulis.
Samtang nagtion sa armas , ang pikas kamot niini gihinol usab sa nagbuntaog nga dughan sa biktima hinungdan nga puwerting kisikisi sa dalaga hangtod nga nalagpot ang iyang shoulder bag ug gisakiyo dayon sa mga tulisan apan walay suwerte ang usa kay nasikop dayon sa kapolisan.