300 na ka makililimos ang na-rescue sa siyudad

Dul-an na sa 300 ka mga makililimos ang na-rescue sa Anti-Mendicancy Task Force sa siyudad sa Sugbu gikan sa buwan sa Enero hangtud kagahapong adlawa.

Kasagaran niini giingong mga menor de edad nga mga anak og Badjao gikan sa Mindanao nga nia na namuyo dinhi sa dakbayan.

Ang mga menor de edad nga na-rescue gitugyan gilayon ngadto sa Parian Drop-In Center ug sa ubang orphanage o organisasyon nga moatiman sa kabataan.

Kadtong mga edaran nga nangasikop, gibuhian ra usab human makahimo og community service nga nalatid sa Anti-Mendicancy Ordinance sa siyudad.

Matod sa labaw sa Department of Social Welfare and Services (DSWS) nga si Cathy Yso, subli nila karong gihingusgan ang ilang kampanya.

Nagkanayon si Yso nga kini ilang gihimo samtang ang dakbayan niobserbar sa Anti-Mendicancy Month niining buwana.

“On-going ang roving sa task force kay naa man gyud gihapon nang magsige og pangayo diha sa kadalanan,” sumala ni Yso.

Niingon si Yso nga ang temang “Ang Paghatag Maayo Apan sa Dalan Dili Husto” mao gihapon karon ang ilang gisunod sa Anti-Mendicancy Month.

Nagkanayon ang labaw sa DSWS nga lakip unya sa dakpon sa task force mao kadtong mga tawo nga maaktuhang mohatag og limos ngadto sa mga makililimos.

Sa pikas bahin, ubay-ubay nga mga kalihukan ang gihan-ay sa kagamhanan sa dakbayan alang sa tibuok buwan nga kasaulugan.

Usa niini mao ang pagpahigayon og “Parent Effective Service” seminar sa mga dapit sa siyudad nga dunay daghang mga kabus nga molupyo.

Nasayran nga nagpadayon usab karon ang DSWS sa pagpasiugda nga mamugna ang Barangay Anti-Mendicancy Task Force diha sa kabarangayan.

Kini aron maoy motabang sa kagamhanan sa dakbayan alang sa hingpit nga pagpatuman sa Anti-Mendicancy Ordinance sa siyudad.