CPPO mangayo pundo pag-ugkat sa mga patay

Nagtinguha ang pangulo sa kapolisan sa probinsya sa Sugbu nga sa sunod pakigkitaan si Gobernador Gwendolyn Garcia aron pahibaw-on nga ilang ugkaton ang mga patay'ng lawas nga gipanglubong sa Isla sa Bantayan nga nabiktima sa bagyong Frank sa milabay'ng bulan.

Si Sr. Supt Carmelo Valmoria, director sa CPPO nagkanayon ang iyang tumong  mao ang pagpangayo og financial assistance ngadto sa gobernador.

Kuyogon ni Valmoria ang mga sakop sa International Commission for Missing Person sa International Police (Interpol) sa Bantayan aron ugkaton ang mga nabalitang mga patay'ng gipanglubong nga wala pa mailhi og gituohang pulos mananagat.

Ang maong tinguha gikatakdang himuon karong Agosto 18 ngadto sa 22 ug plano niining adto na didto himuon ang pagkuha og sample aron mahimoan og DNA testing.

Ang patay mahimong kuhaan og femoral bone aron gamitong post mortem sample alang sa DNA test, ang resulta unya niini ikumparar kung dunay mga kabanay nga nangita og na-missing nga mahal sa kinabuhi atol sa paghapak sa maong bagyo pinaagi usab sa ilang bloodstain sample.

Giklaro ni Valmoria nga ang gikalot nga patay'ng lawas niadtong miaging adlaw kadtong nailhan na sa mga kabanay apan dili ang taga Interpol ug CPPO maoy nagpakalot niini.