Sim pack sa gang gitahan

Gitahan kagahapon sa usa sa mga biktima sa duha ka gipasanginlang sakop sa “Budol Gang” ang sim pack nga giingong iya sa gipatay nga si Jose Mecias Magno nga pulos may mga bahad sa kinabuhi niini.

Si Sr. Insp. Michael Anthony Bastes hepe sa Theft and Robbery Section sa Cebu City Police Office mitug-an nga gitahan kagahapon ang maong sim pack ug gihulagway nga makatabang unya sa ilang imbestigasyon.

Usa sa mga text messages nga gipadala niadtong Mayo Uno sa buntag nagkanayon: “Patuloy nyo lahat gawain nyo kontak ko na ang mga tauhan ng uncle ko c Duterte, magtago na kayo dahil ang dami na ninyong niloko kahit pulis pa ang kap (putol na ang text).”

Laing text message nga gipadala niadtong  Abril 30 nagkanayon: “Hi, kumusta hurot na ang inyong kita? Grabeha gyud ninyo nakailad, karma ra ang inyo naghulat c Satanas mga demonyo mong dagko may adlaw ra mo tanan mahurot mo kamatay wa matulog ang Ginoo I hope mahitabo sa inyong mga anak inyo gibuhat, paghapihapi mo hapit na inyo oras, padung namo sementeryo tanan andam nalang mo daan,” sumala pa sa maong text.

Dugang pa niini ang usa gihapon ka text nga nagkanayon “ang galing nyo. Talagang manloloko, lintik lang ang walang ganti maubos rin kayo lahat magtago kayo kahit saan,” ang tanang mga text gikan sa managlahing cellphone numbers ug petsa.

Niining maong mga text dako ang pagtuo sa kapolisan nga posibleng dunay mga nabiktima nga lawom na kaayo og dulot ang kasuko sa grupo ug karon ila nang gisubay kung si kinsa ang maong mga texters.