Batan-on gitabanga'g pusil patay

Namatay ang usa ka 24 anyos nga lalaki human mabiktima sa pagpusil ingon man dunggab kagahapon sa alas 2:45 sa kaadlawon diha sa sitio Puntod, Alaska barangay Mambaling ning dakbayan.

Ang nalandig sa Cebu City Medical Center (CCMC) giila sa kapulisan nga si Jerome Mijares Cabo way trabaho ug nagpuyo sa nahisgutang lugar.

Samtang ang mga suspetsado nga giila nga sila si Alexis Rosales hingkod ang panuigon nga taga Spolarium St., Duljo-Fatima, usa ka ginganlan lang og “Eman Morales”, ingon man ginganlan og “Adon” uban sa laing   usa sa wala mailhing walo ka mga kaubanan.

Ang biktima nakaangkon og samad pinusilan sa likod-likod nga bahin sa iyang ulo, tuong tiil, ingon man samad dinunggaban sa tuong bahin sa lawas.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang mga suspetsado gikatahong nag-inom sa  usa ka videoke sa usa ka tindahan sa nahisgutang lugar.

Human niini, nibiya apan paglabay sa pipila ka minutos nibalik kini uban sa dugang nga mga kauban ug sa walay daghang rason nipusil  ug nidunggab sa biktima kinsa niadtong tungora gikatahong nagkugos sa dos anyos niining pag-umangkon diha daplin sa dalan nga nagka-istoryahanay sa iyang silingan dihang gikalitan lang sa pagpusil ug gidunggab hinungdan nga nahagba daplin sa dalan samtang ang silingan niini nakadagan.

Human sa pagpamusil ug pagpanungab ang mga suspetsado daling nisibat palayo sa nahisgutang lugar samtang ang biktima gidali sa pagdala sa CCMC.

Apan ang nurse on-duty   nga natawgan sa Banat News kagahapon nibutyag nga nakabsan kini sa kinabuhi samtang gitabang pasado alas singko sa kaadlawon.