Pichay misaad og abyon

Duha ka abyon ang ihatag ni Surigao Congressman Prospero “Butch” Pichay alang sa paglambo sa natad sa aviation sa mga tinun-an sa Philippine State College of Aeronautics dinhi sa Sugbu.

Kini ang giluwatang pamahayag ni Pichay atol sa iyang pakigpulong sa mga tinun-an ug ginikanan atol usab sa ika 30th nga graduation rites sa PHILSCA sa Mactan Benito Ebuen Air Base sa dakbayan sa Lapulapu sa milabay'ng adlaw'ng Biyernes.

Matud pa ni Pichay nga dako kaayo ang demand sa industriya karon sa aviation sa gawas sa nasud ug numero unong gipangita mao ang mga Pilipinong mekaniko. 

Si Pichay misaad nga mohatag og duha ka abyon alang sa mga tinun-an nga makat-on sa pagpalupad sa usa ka abyon ug dili lamang kutob sa pagkahanas sa makina niini.

Ang PHILSCA Campus dinhi sa Sugbu wala pay flying course gumikan kay sa ulohang campus lang gitanyag ang maong kurso.

Si Dr. Enerico Sampang ang College President sa PHILSCA mapasalamaton sa maong tanyag tungod kay dugay na nila kining giplanong himuon.

Dako ang pagtoo ni Dr. Sampang nga sa iyang paghimo og suwat hangyo ngadto kang Presidente Gloria Macapagal Arroyo dili kini magmakuli sa paghatag niini sa ilang hangyo ilabi na kay mismo si Pichay ang moabag kanila sa paghimo niini.

Kun kini mahitabo, nagplano si Sampang pagbutang og satellite campus sa Bohol ug Negros Oriental. 

Ang PHILSCA maoy bugtong Aeronautical School sa nasud ubos kini sa state colleges and universities diin ang mga tinun-an niini anaa sa ubos nga hut-ong sa katilingban apan adunay malantik nga salabutan ug gumikan sa kawad-on maglisod kini sa pagpatungha sa kolehiyo.

Samtang si Dr. Nonadel A. Soriano ang Campus Director sa PHILSCA-MBEAB mipadayag nga dako kaayo ang menus sa gastos sa mga tinun-an kung makakuha sila dinhi og flying courses.