Midangop sa Parian Police Station 1 sa Cebu City Police Office ang usa ka miyembro sa Narcotics Intelligence Education Association (NIEA) nga konektado sa Philippine Drug Enforcement Agency (PDEA-7) human kini gitionan og baby armalite sa ahente sa PDEA-7.
Ang maong insidente nahitabo mga alas 6 niadtong Miyerkules sa gabii atubangan mismo sa buhatan sa PDEA-7 sa R.R. Landon, barangay San Antonio ning dakbayan.
Ang mireklamo sa kapolisan giila nga si Jesus Lopez, 64, taga Casuntingan, Mandaue City.
Samtang ang gireklamo niini mao si Rey Yap, organic member sa PDEA-7 nga matud pa kalit nani-on sa biktima sa walay igong rason.
Base sa blotter sa Parian Police Station ang biktima giubanan kini sa iyang kauban human gihulga ug gitionan ni Yap sa gidala niini nga baby armalite.
Gani ang suspetsado dihang nanion mipadayag pa kini nga “Bisag kinsa noy palabanon nimo” samtang gipugos ang biktima pagsulod sa buhatan sa PDEA-7 diin nahitabo ang konprontasi.
Ang biktima gihatagan og advise sa bise presidente sa NIEA Alfredo Villacencio nga ipa-blotter ang maong insedenti sa kapulisan.
Ang NIEA usa ka non-government organization nga partner sa PDEA pagpang-seminar sa kabaranggayan batok sa ginadiling drugas.