Ginang patay kay naigo sa motorsiklo

Namatay ang usa ka 46 anyos nga ginang human kini mabangga-i sa usa ka motorsiklo samtang padulong unta kining mangompra sa merkado didto sa lungsod sa Poro isla sa Camotes niadtong Sabado sa alas 3  sa hapon.

Ang biktima nga patay diha diha human sa hitabo giila sa kapolisan nga usa ka Lilia Donaire, 46, minyo, molupyo sa barangay Daan Paz sakop sa nahisgutang lugar.

Ang drayber sa motorsiklo nga nakabangga sa biktima giila nga si Macrosin Suralta, 26, ulitawo, molupyo sa barangay Cagcagan sakop sa maong lungsod.

Subay sa inisyal nga imbestigasyon sa kapolisan si Suralta luwan sa iyang motorsiklo nga Honda-155cc kolor pula kauban ang anak niini nga padulong na untang mopauli sa ilang pinuy-anan apan paghiabot niini sa barangay Adela kalit lang  milabang ang biktima og wala makabantay sa naghaguros nga motorsiklo.