Doblehon karon sa Local Price Monitoring Council (LPMC) sa siyudad sa Sugbu ang ilang pagmonitor sa mga tindahan ug kamerkaduhan sa dakbayan.
Kini maoy gipasalig sa chairman sa LPMC nga si City Administrator Francisco Fernandez subay usab sa krisis sa bugas nga nasinati sa nasud. Nabalaka si Fernandez sa padayong pagsaka sa presyo sa bugas taliwala sa gipasalig sa National Food Authority (NFA) nga dunay igong suplay ang nasud niini.
Ugmang adlawa tigumon na usab ni Fernandez ang iyang mga sakop sa LPMC aron subling pahimangnoan sa ilang gimbuhaton.
Kini naglakip sa mga representante gikan sa nagkadaiyang mga ahensya sa gobyerno sama sa DTI, DA, NFA ug uban pa.
Buot sa City Administrator nga mapatuman sa hingpit ang Price Tag Law ingon man ang mga nalatid sa Consumers Welfare Act.
“Atong hugtan pagmonitor aron dili musamot ang kalisod nga gi-antos sa atong kaigsuonan kay posibling dunay mga negosyante nga musakay sa higayon ba,” sumala ni Fernandez.
Una nang gipahibawo sa Grains Retailers Confederation of the Philippines nga padayong nisaka ang presyo sa bugas sa kamerkaduhan.
Kini tungod usab giingong nagkataas ang presyo sa ilang pagkompra niini gikan sa mga dagkong rice traders sa nasod lakip na dinhi sa Sugbu.
Hinuon ang Department of Agriculture gimanduan na ni Presidente Gloria Macapagal Arroyo pagronda sa mga bodega sa gidudahang mga rice hoarders sa nasod.