Mohatag og ganting salapi ang kagamhanan sa dakbayan sa Mandaue alang niadtong makahatag og kasayuran sa gitagoan sa tulo ka mga tulisan sa taxi nga nakapusil patay kang SP01 Pedro Sucion ug miangol kang P02 Darius Conejos sa miaging kaadlawon.
Kini ang gipadayag ni Bise Mayor Carlo Fortuna kinsa naalarma sa nagkagrabe na nga panghitabo sa mga pagpanulis nga dili lang ang pagsakiyo og salapi sa ilang biktimahon kun dili mamusil pa sa mga polis nga motubag sa alarma.
Si Fortuna miingon nga gika-estorya na niya si Majority Floor Leader Victor Biano alang sa maong tinguha nga maoy nalakip sa ilang tukion sa regular session nga ilang pagahimoon karong Miyerkules sa hapon.
Matud pa ni Fortuna nga ang lain nilang lakang mao ang paghatag og financial assistance ni SP01 Sucion ug P02 Conejos nga napusilan samtang nagtuman sa ilang trabaho.
Dugang pa ni Fortuna nga ilang gipaandam kang Konsehal Emiliano Rosal, chairman sa committee on budget and appropriation sa konseho sa dakbayan ang mga dokumento alang sa paghatag og pinansiyal nga hinabang sa mga polis nga nabiktima sa pagpamusil.
Si Sr. Supt. Rodel Calungsod, officer-in-charge sa Mandaue City Police Office (MCPO) miingon nga nangtinabangay na usab ang ilang buhatan alang sa pagtabang sa pamilya sa maong mga polis nga gipamusil sa ilang pagtubag og alarma sa pagpanulais.
Dugang pa niya nga nahinabi na usab niya si Mayor Jonas Cortes kinsa mihimo na usab og lakang alang sa pagtabang sa pamilya sa maong mga polis.