Naligsan sa "mixer" 6 anyos namatay

Patay ang 6 anyos nga batang lalaki dihang nalatayan sa ligid sa mixer nga midumbol sa  giangkasan niining biseklita nga gimaneho sa iyang amahan  subay sa dalan national sa Calajoan, lungsod sa Minglanilla.

Ang namatay mao si Rox Vincent Roloque nga anak ni Roy Roloque, 31 anyos  nga taga Lower Calajoan sa maong lungsod kinsa nakasinati usab og grabeng pagkaangol.

Gimaneho ni George Oyangorin, hingkod ang panuigon, taga Biasong, dakbayan sa Talisay ug trabahante sa usa ka construction firm.

Si PO2 Avelino Seloria nga gikahinabi sa Banat News miingon nga padulong pauli ang amahan ug anak dihang paghidangat sa maong dapit kalit lang kini gidombol sa nagsunod nga mixer.

Matud pa ni Seloria,  nalagpot ang amahan sa unahan tungod sa kusog nga impact sa maong pagdasmag apan ang bata nga natagak sa ubos maoy nalatayan sa ligid.

Si Seloria miingon nga ang suspetsadong drayber nga mitahan human sa aksidente ang gitanggong karon sa ilang bilanggoan ug tukmang lakang ang ilang pagahimoon batok niini.