Napalgang patay sulod sa kusina sa ilang balay nga nabulit og samad pinusilan sa nagkadaiyang parte sa kalawasan ang usa ka gwardya niadtong Biyernes sa hapon diha sa sitio Hinagdanan, barangay Manduwang lungsod sa Minglanilla.
Segun sa report sa Provincial Police ang kapolisan sa Minglanilla nakadawat og report kabahin sa patay'ng lawas nga nakit-an nga nagbuy-od sulod sa balay sa nahisgutang lugar.
Ang mga polis sa Minglanilla miila sa biktima mao si Jacinto Alagase Jr. 40, lumad nga taga La Paz, Shrine siyudad sa Bogo ug kasamtangang nagpuyo sa nahisgutang lugar.
Nasayran usab sa kapolisan ang biktima nagtrabaho isip security guard sa Saint Therese Protection and Investigation Security Agency nga nahimutang sa dalan V. Gullas ning dakbayan sa Sugbu.
Ang biktima gisuwayan unta sa paghatud sa Minglanilla District Hospital apan patay na kining nahidangat sa maong tambalanan.
Ang kapolisan sa Minglanilla hangtud karun blangko pa gihapon sa pag-ila sa mamumuno sa biktima apan nagpadayon ang ilang imbestigasyon aron masuta ang motibo ug pag-ila sa responsable sa krimen.