Ubay-ubay nga mga panimalay diha sa Camagong Lahug ang gipaabot nga i-demolish sa sunod nga semana sumala pa sa hepe sa Squatters Prevention Encroachment and Elimination Division kun SPEED nga si Vicente Mercado.
Matud pa ni Mercado mipadangat na sila kagahapong adlawa sa seven-day-notice to vacate ngadto sa mga pamilya nga maapektahan sa demolisyon.
“After sa seven-day-notice, i-demolish na gyud na sila kay ni-encroach man gud sa dalan,” sumala pa ni Mercado.
Giklaro ni Mercado nga way kalabutan sa politika ang ilang ipahigayon nga demolisyon human dunay mga migawas nga pagdudang paggukod kini sa kagamhanan ngadto kang Lahug barangay kapitan Mary Ann delos Santos.
Gipadayag sa hepe sa SPEED nga dugay ra unta nilang ipatuman ang demolisyon hangtud nga naabtan sa election period.
Labing minos 70 ka balay ug payag diha sa maong dalan ang maapektahan apan wala pay kasiguruhan kung dunay dapit alang sa ilang relokasyon.