Linog mitay-og sa Dumaguete

Usa ka linog ang mitay-og sa Dumaguete City kagahapon sa buntag nga nakahatag og dakong surpresa sa mga molupyo sa nahisgutang dakbayan.

Nasayran gikan kang Robinson Jorjio, seismic observer sa Philippine Institute of Volcanology and Seismologist (phivolcs) alas 8:17 sa buntag miigo ang maong linog kinse kilometros sa Southwest Dumaguete.

Matud ni Jorjio ang Dumaguete City maoy sentro sa naigo sa maong linog nga mitala og intensity 5 nga dunay magnitude nga 4.4 sa richter scale ug tectonic ang hinungdan niini.

Sa paghimo ning balita wala pay nadawat nga report ang Phivolcs sa mga gikatahong kadaot nga naangkon sa maong lugar nga epekto sa maong linog.

Samtang gibutyag ni P03 Felicisimo Aranas, desk officer sa Dumaguete City Police Office nahitabo ang maong linog atol  nga nagpahigayon sila og formation gawas  ilang police station.

Matud ni P03 Aranas nakalitan sila tungod kay kalit lang miuyog ang ilang tower antenna ug ang mga gi-parking nga sakyanan gawas sa ilang estasyonan gumikan sa maong linog nga gibanabana nila nga milanat og dos ngadto sa tres segundos.

Matud ni P03 Aranas wala pa usab silay nadawat nga report may labot sa mga kadaot gumikan sa maong miigo nga linog.