Roces musical off to NY / Doctorate for Alvarez

Unom ka mga polis sa Cebu City Police Office ang girekomendar nga imbestigahon tungod sa kapakyas nila pagtambong sa mga kalihukan sa Camp Sotero Cabahug sulod sa pipila na ka higayon.

Si Sr.Supt. Patrocinio Comendador mitug-an sa mga tigbalita nga angayang disiplinahon iyang mga sakop nga "naanad" nalang og absent sa mga kalihukan sa kampo sama sa tradisyonal nga pagpahigayon og flag raising ceremony matag Lunes sa buntag.

Ang maong mga polis mao sila si SPO1 Fernando Velarde; SPO1 Cesario Torregosa, SPO1 Adonis Burgos, PO3 Simeon Tapanan; PO1 Francisco Macalino ug PO1 Ryan Heyrosa nga pulos mga sakop sa Beat Patrol.

Apan nagtuo si Comendador nga duna pay ubang mga polis diha sa ubang unit nga nakahimo niini ug ila pa karong gisubay  ang  mga attendance.

Sagad kanila miabsent og duha ka adlaw ug ang uban tulo ka adlaw. Sumala pang Comendador sa patakaran sa National Police Commission kun tulo ka nagsunod nga adlaw dili mo-duty ang polis padad-an kini dayon og return to work order.

Sumala pang Comendador namatikdan niyang ang ubang mga polis nga nakahibalo sa maong patakaran moabsent og kaduha ug mobalik og duty sa ikatulong adlaw aron dili masilutan.

Nunot niini nagplano si Comendador nga tigumon ang maong mga absences ug gamitong aggravating evidence aron pasakaan gihapon sila og kasong administratiba tungod sa basehan nga nahimo  nang "habitual" ang ilang pag-absent.

Apan giklaro ni Comendador nga wala hinuon magpasabot nga kung ang pag-absent sa flag raising ceremony mangahulugan tibuok adlaw gyud ang ilang pag-absent apan angayan gihapon silang manubag isip usa ka sakop sa uniformed service.-Edwin Ian Melecio