OFW giabuso, gitanggong sa Singapore

Usa ka 27 anyos nga OFW nga kagahapon pa sa buntag miabot gikan sa Singapore ang midangop sa Criminal Investigation and Detection Group ug misumbong sa pagpangabuso kaniya sa iyang agalon ug pag-ilad kaniya sa ahensyang mi-rekrut kaniya.

Si Rapunzel Sanoria Omandam, 27, minyo ug lumad nga taga barangay Samlog lungsod sa Lupon sa Davao Oriental uban sa iyang maguwang nga si Vilma Peters misumbong sa iyang pait nga kasinatian.

Si Omandam nga gihinabi sa mga tigbalita mitug-an nga nailad siya sa silingang midwife sa barangay Cocanon sa ilang lungsod nga si Marilyn Gogo kinsa maoy mipasalig nga tabangan siyang makatrabaho sa Singapore.

Gipasaligan siyang kuhaan ang iyang sweldo sa gastos sa iyang pagbiyahe ug papeles sulod sa unom ka buwan apan diha palang sa airport sa Manila ulahi na nilang nahibaw-an nga 'turista' ra ang ilang papeles.

Tungod sa kalisod ug sa nagastos na nga P12 mil sa papeles ug uban pa nipadayon og larga si Omandam niadtong Marso 20,2006 sa maong nasud diin siya nahimong katabang, apan dangtan ang upat ka bulan nasakit siya ug giuli ngadto sa Serve Link Agency nga gipanag-iya og Singaporean.

Milanat og usa ka buwan siyang gitanggong sa giingong "training center" nga usa ra diay ka balay nga butanganan sa mga iligal nga mga narekrut kung dunay reklamo ang ilang mga agalon.

Hangtud nga gikuha siya sa usa ka babayeng giilang Leong Foong Gee Flora ug gipatrabaho sa inahan niining giilang si Elsie Leong, apan di katabang kundili tigluto og mga pineapple cookies nga maoy nakadaut sa iyang mga kuko ug kamot sulod sa unom ka bulan, diin matag dunay sayop gikatahong dukdukon iyang ulo, birahon ang buhok ug sagpa-sagpaon.

Human sa unom ka buwan gitanggong na usab siya sa 'training center" apan nakugang siya dihang buot na siyang mopauli sa Pilipinas gipaninglan siya og gibana-banang 750 Singaporean dollars sa ahensya tungod sa deductions ug pagpuyo niya sa training center.

Matud pa niya nga sa kinatibuk-an nakakobra lang siya og 140 Singaporean dollars, ug ang iyang igsuong si Peters nga nagpatabang sa embahada didto mao pay mipalit og tiket alang sa iyang pagpauli.

Dugang pang Omandam nga nagpatabang pa ang embahada og polis sa Singapore aron siya pagawson. Sumala pa sa embahada didto kang Peters dili dokumentado si Omandam maong wala silay kasayuran kaniya.

Gitug-an ni Omandam nga daghan pang mga Pinay nga tua karon gitanggong sa maong 'training center' nga nalubong na sa utang nga minugna ra sa ahensya