Kini ang nasayran sa Banat News kang Mayor Thadeo Ouano sa follow- up kagahapon sa kahimtang sa mga biktima sa sunog.
Ang Gawad Kalinga nga nagtinguha usab sa pagpatukod og 100 ka panimalay nga kapuy-an sa mga biktima ang gikatakdang magsugod na sa ilang trabaho karong sunod semana.
Si Ouano miingon nga mokabat sa 300 ka pamilya sa sunog ang nakadawat og relief assistance gikan sa Philippine National Red Cross.
"This is the first large-scale relief operation following the massive fire which destroyed at least 1,400 homes in the city," nagkanayon si Ouano.
Matud pa niya nga ang 300 ka beneficiaries maoy giila sa PNRC-Cebu Chapter nga maoy labing kabus nga lumolupyo kinsa gihatagan og unom ka kilo nga bugas ug nagkadaiyang linata nga pagkaon ug mga sapot, mga banig, habol ug uban pa.
Si Ouano miingon nga ang kagamhanan sa dakbayan mogahin usab og pundong salapi nga mokabat sa P16 milyones gikan sa P26.4 milyones nga calamity fund sa dakbayan.
Dugang pa niya, si Gobernador Gwendolyn Garcia sa gihimong pagduaw sa mga biktima niadtong miaging adlaw, mihatag usab og tseke nga nagkantidad og P5 milyones.
Ang maong kantidad nga gihatag sa gobernador maoy nadugang sa unang gihatag sa lalawigan nga nagkantidad og P6.4 nga relief assistance sa mga biktima.