Si mayor Mancio miingon nga dili tinuod ang maong report nga nangluod silang duha si mayor Escario gumikan kay nagpabilin silang loyal sa gobernador sukad nga mitapon sila sa kampo niini og mihurar niadtong Pebrero didto sa kauluhan.
Iyang giklaro nga kining maong klase sa intriga sa kaatbang nila sa politika dili nalang niya hatagan pag dakong gimbug-aton ug mosentro nalang sila sa ilang mga serbisyo ngadto sa katawhan sa ilang lungsod ug gawas pa makita sa eleksyon sa Mayo kun si kinsa gihapon ang pili-on sa katawhan sa ilang dapit.
Samtang sa iyang bahin si mayor Geralyn Escario sa Bantayan miingon nga dili usab tinuod ang maong balita gumikan kay nagpabilin nga ligon ang ilang pagsalig sa gobernador gumikan usab sa mga kaayuhan og benipesyo nga gipadangat sa Kapitolyo diha sa ilang lungsod hinungdan nga way rason nga mobiya sila sa kampo sa gobernador.
Giklaro usab niya nga kining mga black propaganda lang sa kaatbang nila sa politika apan para kaniya dili kini nila hatagan og dakong importansya gumikan kay lahi ang pamaagi sa pangagamhanan sa banay'ng Escario.
Kahinumduman nga si kanhi kongresista Junnie Martinez Jr. mibutyag basi sa iyang impormasyon nga nahipos gikan sa iyang mga kaalyado diha sa ika-upat nga distrito ang duha ka mayor nga si Mancio ug Escario mobiya na unya sa gobernador sa dili pa moabot ang eleksyon sa Mayo gumikan kay matud pa niini nga nahiubos sila sa gobernador nga wa mahatag ang ilang gipangayong proyekto.
Gani si Martinez nagkanayon nga nunot sa maong kalamboan nisamot na karon ug kahuyang ang mga kaalyado sa gobernador sa gobernador diha sa ika-upat nga distrito hinungdan nga kumpiyansa siya nga mas lig-on ang iyang kandidato karong eleksyon sa Mayo.
Una niini si Garcia mihulagway nga nahugno na ang liderato sa mga banay'ng Martinez diha sa ikaupat nga distrito sa lalawigan human usab midawat si kanhi bokal Benhur Salimbangon isip kandidato sa One Cebu Party diin maisip kini nga sinyales na sa kagawasan sa katawhan sa nahisgutang distrito.