Cuenco nasagmuyo 'pagbali' ni Pasil Brgy. Kapitan Ocarol

Si Cebu City South District Rep. Antonio Cuenco nasagmuyo sa taho kalabot sa pagbali ni barangay kapitan Romeo Ocarol sa barangay Pasil human kini mi anunsyo sa iyang pagsuporta ngadto sa kandidatura ni Jonathan Guardo isip pagka-kongresista sa lalawigan sa Sugbu semana na ang nakalabay.

Si Cuenco nga gikahinabi sa Banat News miingon nga wala niya damha ang pagbali sa iyang suod nga higala ngadto sa kontra niini sa pagkakongresista nga si Guardo.

Matud pa ni Cuenco nga nanghinaut gihapon siya nga makamata ug malamdagan ang panghuna-huna niini sanglit giila man lang gihapon kini niya nga higala bisan pa man sa pagbali niini.

"I don't want to question his motive, but he still remain my close friend. And I am hoping that he would change his mind," matud pa ni Cuenco

Samtang sa laing bahin mga residente sa Barangay Pasil nanumpa atubangan nila ni Cuenco ug Konsehal Gerry Carillo nga pabilin ang ilang pagsuporta sa Bando-Osmeña Pundok Kauswagan (BO-PK) karong umaabot nga piniliay sa buwan sa Mayo.

Bisan pa man ug wala na niini misuporta ang ilang kaugalingon barangay kapitan.

Gipasalig usab sa mga residente sa maong barangay nga paluyohan ang tanang line-up sa BO-PK nga magpapili karong piniliay.