Ate Glo nangayog suporta

Si Presidente Gloria Macapagal-Arroyo nangayo og suporta ngadto kang Lapu-Lapu City Mayor Arturo Radaza alang sa iyang mga kandidato sa Team Unity atol sa kapistahan sa Mactan sa milabay'ng Sabado.

Matud pa ni Junard "Ahong" Chan, tigpamaba sa kagamhanang lokal sa dakbayan sa Lapu-Lapu, ang pagbisita ni Presidente Arroyo sa panimalay ni Radaza niadtong gabii human sa ilang proclamation rally sa Team Unity sa dakbayan sa Sugbo dili kini tinuyo nga schedule sa presidente ug sa iyang mga kandidato sa Team Unity.

Matud pa ni Chan nga nalipay lang si Arroyo sa iyang nakita nga kasensiro sa hugot nga suporta niini sa milabay'ng eleksiyon diin sa usa ka dako kaayo nga billboard sa panimalay ni Radaza nakabutang ang pulong "Kaming mga Oponganons kanunay nga mosuporta kanimo" hinungdan nga human sa ilang rally sa dakbayan sa Sugbu midalikyat gyud si Arroyo ug ang mga kandidato sa kapistahan sa Mactan.

Bisan pa sa kagamay sa kapistahan ni Sr. Sto. Niño sa Barangay Mactan apan gibisita kini sa presidente ug gani ang katawhan nagpunsisok usab sa pagtan-aw sa ilang mga idolong kandidato sa partido.

Gumikan niini, si Arroyo mihangyo ngadto kang Radaza sa iyang suporta sa pagdala sa tingog sa iyang mga kandidato sa Team Unity ngadto sa katawhang Oponganons sa umaabot nga piniliay.

Samtang si Radaza usab mapasaligon sa iyang suporta ngadto kang Arroyo ug sa iyang mga kandidato gumikan kay daan na nga si Radaza mipadayag nga "Ang buhat maoy pasultihon ug dili ang sulti maoy pabuhaton."