Si PO2 Job Sarbida miila sa namatay nga mao si Francis May Ripdos kansang ulo naligsan sa trak ug ang naangol nga inahan mao si Anselma, hingkod ang panuigon ug mga lumolupyo sa nahisgotang dapit.
Matud pa ni PO2 Sarbida nga angkas ang inahan ug anak sa habal-habal nga gimaneho ni Jennefer Parba, 20 anyos, ulitawo nga taga Cabcaban, Barili.
Si PO2 Sarbida miingon nga dunay delivery canter truck nga nagdala sa plate number nga GDV 295 ug gimaneho ni Samuel Bertolfo Igloria, 47 anyos, minyo nga taga Mantalongon, Barili, Cebu nga gikasugat ni Parba.
Sa imbestigasyon gialegar ni Jennefer nga tungod sa kasuwaw sa suga sa gikasugat niyang sakyanan nga gimaneho ni Igloria wala niya makita ang karsada.
Kini ang hinungdan nga nadasmag ang iyang motorsiklo sa nagtipon-og nga graba nga maoy nakaingon sa ilang pagkalamba ug nalagpot sila sa taliwala sa karsada.
Dugang pa ni PO2 Sarbida nga naligsan ang ulo ni Francis May sa ligid sa delivery truck nga gimaneho ni Igloria nga maoy nakaingon sa hinanali niining kamatayon.
Matud pa ni PO2 Sarbida nga si Anselma ang dali nga gidala sa tambalanan ug ang duha ka mga driver ang giditinir karon sa buhatan sa kapolisan sa maong lungsod alang sa tukmang lakang nga ilang pagahimoon.