Reklamo aksyonan sa Sinulog F. apan...

Hatagan og pagtagad sa Sinulog Foundation kon mosang-at og pormal nga reklamo kadtong mga contingent nga diskuntento sa resulta sa nigawas nga mananaug sa nilabay'ng Sinulog Mardi Gras niadtong Domingo.

Matod ni Bise mayor MichAel Rama, over all chairman sa Sinulog Foundation bukas kanunay ang legal and arbitration board pagpanawat niadtong mga reklamo.

Apan gibarugan ni Rama nga final and executory na ang desisyon sa mga hurado nga nagpili sa mga mananaug sa Sinulog.

Kini maoy hinungdan nga ni-reklamo ang contingent sa Compostela National High School tungod kay alang nila dako unta sila og puntos nga makuha gumikan sa ilang maayong performance nga gipakita.

Nasayran nga ang Compostela nahimutang lang sa ikalima sa Sinulog Based Category tungod kay ang Tribu Sinandoloy sa Tangub City maoy nigawas nga kampyon og 2nd place ang Tribu Mazda sa Lapulapu National High School, ikatulo ang Alcoy Siloy og ika-upat ang Tawo Tawo festival sa Bayawan City.

Hinoon alang sa bise mayor normal lang ang maong gipakitang reaksiyon sa mga ingon niining klase sa kompetisyon nga dunay mapili nga mananaug og duna say mapildi.

Matod pa nakuhaan ang puntos nga nakuha sa contingent sa Compostela tungod sa ilang pagbilin ug wala paghipos sa ilang props human sa ilang presentasyon diha sa Cebu City Sports Center.