MCPO patrol cars gibalik kagahapon

Ang nasinati nga kakulang sa mga sakyanan sa kapolisan sa Mandaue City Police Office (MCPO) nasulbad na human usab mahibalik ang mga terrano ug multicab nga giabangan sa dakbayan sa RDAK Transport Equipment kagahapon sa buntag.

Si Mayor Thadeo Ouano ug ang kadagkoan sa RDAK Transport Equipment ang nakahimo sa pagpinirmahay sa kontrata nga maoy hinungdan sa pagpabalik usab sa maong mga sakyanan sa kapolisan.

Kahinumdoman nga walo ka terrano ug unom ka mga multicab nga gigamit nga mga sakyanan sa unom ka presinto sa kapolisan ug sa uban pang kuwerpo sa MCPO sa ilang pagpatrolya ug pagtubag sa mga alarma.

Gibawi sa tagdumala sa RDAK Transport Equipment ang mao nilang mga sakyanan human usab matapos ang ilang kontrata niadtong Disyembre 31 sa miaging tuig.

Kini ang hinungdan sa pagbawi na sa maong mga sakyanan sa kapolisan niadtong miaging semana nga maoy nakaaghat kang Senior Superintende Alexander Abadinas, direktor sa MCPO sa pagdistino sa kapolisan sa mga dapit nga sagad nahitabo ang krimen.

Gidali sa pagsulbad ni Mayor Ouano ang maong suliran sa kapolisan nga kakulang sa magamit nga mga sakyanan sanglit gikatakda na usab ang 12th Asean Summit karong sunod semana.