7 Koreano nanggubot sa mall

Pito ka mga Koreyano ang gipanakop human sila pasanginling mimugna og kagubot sulod sa entertainment center sa usa ka dakong mall sa uptown area human giingong mag-unay og lalis ug naghataay og sukmagay niadtong milabayng gabii.

Ang gipangdakop giilang sila si Lim Chiong Huan, 19, Kim Seung Keun, 19, Kim En Jeung, 19, Park Jeu Tai, 22, Osan Ju, 19, Kim Gok,19 ug Shen Hyun So,19, pulos mga taga South Korea nga nanganhi dinhi aron pagtuon sa pinulungang Englis ug kasamtangang nagtuon sa usa ka unibersidad sa dakbayan sa Mandaue diin usab sila magpuyo karon.

Sumala pa ni PO1 Joseph Cutanda sa Mabolo police station sa pakighinabi sa Banat News nagubot ang maong dapit dihang nagkainitay ang mga langyaw ug misangko sa inimingay og kumo hangtud nga ang ubang mga kustomer naapektahan sa ilang kagubot.

"Sila-sila ra may nag-away-away, unya wala man sad sila motug-an kung unsay hinungdan kay di man ta makasabot sa ilang sinultihan," asoy pang Cutanda.

Ang mga gwardiyang sila si William Husoy, Policarpio Cajigas, Robert Prado, Gualberto Taghop, Allan Hermis ug Brian Mendejar mao nay mibadlong kanila aron pakgangon ang panag-away.

Gikatahong sa una, wala sila dayon mopatuo maong gidala sila sa mga gwardiya ngadto sa Mabolo Police station diin sila giimbestigar.

Nunot niini ang pito gipailawom sa liquor test sa Cebu City Medical Center diin mitumaw nga sila si Huan, Tai, Ju, Gok ug Jeung positibong nakainom og bino.

Ang pito nakatulog sa karsel sa Mabolo apan kagahapon sa buntag, gipasaylo sila sa maong mall ug gipabuhian sanglit di na sila pasakaan og kaso tungod sa kagubot nga ilang namugna.

Ang dakbayan sa Sugbo maoy nag-unang destinasyon sa mga turistang Koreyano.

Ang mga Koreyano maoy labing daghan og mga turistang manganhi sa Sugbo matag tuig gani mismong ang kapolisan dinhi gipatungha na pagtuon og pinulungang Koreyano aron masayon ang komunikasyon kung dunay motumaw nga problema.