Ang biktima mao si Geneses Jaime, 15, taga Bolyang, Compostela ug ang nakapusil mao ang 17 anyos nga lalaki (pangalan gipugngan) kinsa silingan usab niini sa maong dapit.
Si Insp. Ramon Lacno, hepe sa kapolisan sa nahisgotang lungsod nga gikahinabi sa Banat News miingon nga nakaangkon og usa ka samad pinusilan sa dughan ang biktima ug gipaubos kini sa operasyon sa mga doktor sa Vicente Sotto Memorial Medical Center sa dakbayan sa Sugbo.
Gitug-an ni Insp. Lacno nga kuyog sa laing lima pa ka silingan nilang mga batan-on ang biktima ug ang suspetsado nga nanimo sa usa ka tindahan sa maong dapit.
Gitagsatagsa sa pag-imbestigar ang lima ka mga batang kuyog sa biktima ug suspetsado.
Subay sa imbestigasyon nga ilang gihimo ni Inspector Lacno ilang nasayran nga gipaibog sa suspetsado ngadto sa mga kuyog nilang mga bata ang armas apan kalit kining mibuto ug ang bala niini didto mopaingon sa dughan sa biktima.
Sumala pa ni Insp. Lacno nga ang suspetsado ilang gitanggong sa detention cell ang suspetsado alang sa tukmang lakang nga pagahimoon batok niini.