2 lalaki gipusil patay

Duha ka mga lalaki ang gipamusil patay sa managlahing dapit dinhi sa dakbayan sa Sugbo niadtong milabay'ng gabii, ang usa kanila gipatay sa iyang bayaw gumikan sa pasangil nga kawatan kini.

Giila ang mga gipatay mao si Marcelino Aguilar, 44, kinsa magbalantay sa usa ka surplus shop sa dalan Sanciangko ug nagpuyo diha sa South Road sa Kinasang-an ning dakbayan.

Sa imbestigasyon sa Homicide Section si Aguilar gipusil sa duha ka wala mailhing mga tawo nga pulos nagsuot og shortpants ug t-shirt nga armado og wala matinong kalibre sa armas.

Sumala pa sa gwardiya sa usa ka gasolinahan diha sa nahisgutang dapit nakadungog nalang siya og tulo ka sipang buto sa armas gikan sa nahitaboan dihang iyang gisusi nagbuy-od na ang biktima.

Ang duha ka mga suspek maoy iyang nakit-ang naglakaw nga mibiya diha sa dapit ug wala na igkita, ang usa sa mga suspek nagsuot og kolor yellow nga t-shirt ug ang usa kolor puti nga t-shirt ug semi opaw ang buhok.

Matud pang SPO1 Rey Cuyos nga nangita pa sila og dugang testigo aron maoy moila sa mga suspek.

Samtang niadtong Domingo sa buntag diha sa bukirong sitio Buwakaw, barangay sa Toong, usa ka Eliseo Bonghanoy, 39, ang gipatay sa iyang bayaw nga si Efren Sabal,39, mag-uuma nga taga Campo 3 sa dakbayan sa Talisay.

Sumala pa sa asawa sa biktima nga kasamtangang nakigtabi ang iyang bana ug silingang si Gregorio Jaberina dihang miabot ang suspek ug kalit nga mipusil sa iyang bana.