Modelo ang Mandaue sa waste management program

Gihimong modelo lukop nasud ang Solid Waste Management Program sa kagamhanan sa dakbayan sa Mandaue.

Matud pa ni Mayor Thadeo Ouano nga ang mga local government units lukop nasud ang nisundog sa ilang pagpatuman sa maong programa.

"It has been made model of LGU of the country as far as solid waste management implementation is concerned," nagkanayun si Ouano.

Matud pa ni Ouano nga ang mga opisyal sa dakbayan sa Taguig nga gipanguluhan ni Mayor Siegfredo Tinga ang personal gyud nga nibisita sa syudad aron pag-obserbar sa ilang implementasyon sa programa.

Gani, ang hunta probinsiyal sa Sugbo nipasidungog sa dakbayan sa Mandaue sa malampusong pagpatuman sa Ecological Solid Waste Management Act of 2000.

Kini nalatid sa resolusyon nga giduso nilang Bokal Agnes Magpale, Bokal Gabriel Luis Quisumbing ug Bokal Victor Maambong ug gipasar sa hunta probinsiyal niadtong Hunyo 29, 2006 ug giaprobahan ni Bise-Gob. Gregorio Sanchez sa Hulyo 11, 2006.

"Mindful of the success, prominence and fame it brought to its mother province, the City of Mandaue deserves to be applauded," matud pa ni Ouano.

Sayo niini, gikataho nga gidam-ak lang sa wala mahuman nga warehouse sa reclamation area ang mga mahalong garbage bins ug wala gamita.

Apan si Ouano nipasabot nga reserba ang maong mga garbage bins sa mga gipakatap na sa kadalanan ug wala lang kini matarung paghipos sanglit wala pa nahuman ang warehouse nga gitukod sa syudad sa barangay Basak.