Babayeng pusher gikiha

Gipasakaan na og kasong kalapasan sa balaod nga nagdili sa pagpamaligya og ilegal nga drugas ang usa ka inahan nga nasikop atol sa buy-bust operation sa mga sakop sa Provincial Intelligence and Investigation Bureau, Philippine Drug Enforcement Agency ug sa Consolacion Police didto sa Poblacion Occidental, Consolacion sa milabay'ng adlaw.

Matud pa ni Insp. Wilfredo Pulvera sa PIIB nga human nila makuha ang mga ebidensiya sa PNP Crime Laboratory nga naghatag og positibong grano sa shabu ang gipamaligya ni Aida Empleyo Ledesma, legal ang panuigon ug lumolupyo sa Poblacion Occidental, Consolacion ila nang gipasaka ngadto sa korte ang kasong kalapasan sa RA 9165 kagahapong adlawa.

Kahinumduman nga si Ledesma dugay nang gipanid-an sa PIIB ug sa Consolacion Police tungod sa ilegal nga operasyon niini sa maong dapit hinungdan nga ilang gipahigayon ang usa ka buy-bust operation.

Atol sa maong operasyon nakuha ang tulo ka gagmay'ng pakete sa gituohang shabu ug ang buy-bust marked money nga P200.

Si Ledesma anaa pa karon gidetiner sa kapolisan sa Consolacion samtang pormal na nga gipasaka ang kaso niini ngadto sa hukmanan.