Tau Gamma gipatay

Patay ang usa ka sakop sa Tau Gamma Phi human kini pusila didto sa Sitio Guiwanon, Poblacion, Compostela kagahapon sa kadlawon.

Ang biktima mao si Juniter Emboy, 21, ulitawo, nagpuyo sa maong dapit ug usa ka tinun-an sa kolehiyo ug usa ka sakop sa Tau Gamma Phi fraternity. Samtang duha ka mga batan-on ang gitumbok nga responsable sa maong krimen.

Base sa imbestigasyon nga gihimo ni PO2 Oliver Rondina sa Compostela Police Station nasayran nga samtang naglakaw kini sa maong dalan kuyog ang iyang hinigugma ilang nasugatan ang duha ka mga batan-ong lalaki nga nagpangidaron og 15 ngadto sa 17 anyos.

Sa dihang nagkaduol na sila kalit lang mibunot ang usa niini dayong pusil ngadto kang Juniter hinungdan sa pagkahiagum niini ug samad pinusilan sa iyang ilok sa wala pa mailhing kalibre sa armas.

Gidali og dala si Juniter sa Chong Hua Hospital apan gideklarar kini nga dead on arrival sa mga doktor, samtang ang duha ka batan-ong namusil dali kaayong nakasibat sa maong dapit,

Usa sa anggulo nga gilantaw sa kapolisan sa Compostela mao ang panagbingkil sa mga fraternity ug gidudahan nga mga sakop sa Akrho ang mipusil patay ni Juniter. Padayon pa gihapon karon ang ilang imbestigasyon aron mailhan ang mga responsible.