Ronda kontra sugal nakakuha og shabu, siyam natanggong

Gidakop ug gibalhog sa bilanggoan ang siyam ka tawo nga naaktuhang nagsugal og hantak, lakip na ang usa ka babaye nga kuyog sa laing usa ka lalaking nasakmitan og shabu ug mga kahimanan sa pagamit niini.

Ang pagdakop natigayon didto sa Sitio Sab-a sa barangay Paknaan sa maong dakbayan alas 5 pasado ang takna sa miaging hapon.

Ang mga nadakpan mao sila si Jimmy Terol, 23, minyo, taga Pagsabungan, Vincent Terol, 18, Ariel Judilla, 25, minyo, Victor Nalzaro, 41, Eduardo Benero-o, 30, Rey Sumagang, 36, John Kevin, Guido, Helen Manatad ug Ambrocio nga pulos nagpuyo sa barangay Labangon, Cebu.

Ang pagdakop ang natigayon pinaagi sa joint operation nga ilang gipahigayon nga naglangkob kanila nila ni PO3 Lino Baylosis ug PO3 Allan Alinsonod ug mga kaubang sakop sa vice squad section sa kapolisan sa dakbayan.

Si SPO1 Rey Jaron sa Intelligence and Investigation section sa kapolisan sa maong dakbayan nga gikahinabi sa Banat News miingon nga ang pagronda gihimo sa Philippine Drug Inforcement Agency (PDEA-7) dinhi sa Sugbo.

Ang unom kanila nga mga sugarol og hantak ang gipasakaan og kaso nga kalapasan sa Presidential Decree 1602 kun ilegal nga masiao.

Samtang duha ka kaso ang atubangon ni Manatad ug Heyrosa tungod sa pagsugal og hantak ug paghupot og shabu nga nasakmit sa kapolisan gikan kanila.