Crips, Bloods nang-recruit og mga pupil

Mga magtutudlo sa Lagtang Elementary School dakbayan sa Talisay gibati og kahadlok sa grupo sa Crips ug Bloods, duha ka grupo sa fraternity kinsa mag-sige og pang-recruit og mga miyembro diha sa maong tunghaan.

Si Nannette Garrido prinsipal sa maong tunghaan mitaho sa kapolisan sa Talisay sa maong insidente aron mangayo og tabang nga mahunong ang nahisgutang grupo sa mga kalihokan niini.

Si Supt. Audie Villacin hepe sa kapolisan sa siyudad mibutyag kagahapon sa Banat News nga kasagarang naagni sa maong grupo mga tinun-an sa grade III ug IV.

Matud ni Villacin nga ang mga sakop sa Bloods ug Crips mosulod sa nahisgutang tunghaan tungod kay wala kini klarong koral unya magtambo sa bintana sa mga classroom samtang dunay gipahigayong klase.

Hudlaton sa nahisgutang grupo ang mga magtutudlo kun dunay ilang miyembro nga kasab-an sa magtutudlo.

Si Villacin nagkanayon nga pahigpitan niya sa pagpatrolya ang mga tunghaan sa siyudad diin ipahigayon kini matag buntag ug hapon ilabi na sa elementarya ug giawhag usab niya ang mga ginikanan sa mga estudyante ug mga magtutudlo sa paglig-on sa ilang mga aktibidades para mohunong ang maong mga fraternity sa ilang kalihukan.