Unang naalarma ang mga molupyo sa Barangay Hilasgasan, lungsod sa Barili gumikan sa nagsunod nga insidente sa pagpangawat og pagkaon ug mga kagamitan sa ilang kusina.
Dunay nakamatikod nga mga batan-on ang mga responsable sa mga pagpangawat maong ila kining gisumbong ngadto sa kapolisan.
Atol sa pagpatrolya niadtong Martes sa buntag diha sa Hilasgasan nasugatan sa mga polis ang lima ka mga batan-ong naglago ang mga sapot gikan sa kakahuyan hinungdan nga ila kining gisita.
Usa sa mga suspek miangkong mga eskapo sila gikan sa RRCY sa Argao ug padulong na sila motahan sa barangay kapitan sa Hilasgasan gumikan usab sa kagutom ug dili maagwantang mga lamok diha sa langob nga ilang giokupar.
Si SPO3 Edward Villaester sa Barili Police sa pakighinabi sa Banat News mitug-an nga gikuha na sa Department of Social Welfare and Development 7 ang duha sa mga eskapo samtang ang tulo nagpabilin pa diha sa ilang buhatan.
Si SPO2 Mansueto Vicente Lopez ang Deputy chief sa Argao police station sa pakighinabi sa Banat News nagkanayon nga wala pa sila makadawat og impormasyon kalabot sa mga eskapo.
Gisuwayan og kuha sa Banat News ang habig sa RRCY apan napakyas ang maong tinguha.