Drayber traysikad gitigbas og babaye

Samdan sa iyang ulo ug buko-buko ang usa ka lalaki human kini gitigbas sa makadaghan sa iyang silingang babaye gumikan sa panaglalis sa iyang asawa tungod lang sa tubig ulan didto sa Barangay Ermita dakbayan sa Sugbo kagahapon.

Hubog nga misulong sa panimalay sa biktima nga si Rolly Rado, 27 anyos, usa ka drayber sa traysikad ang silingan niining si Virgie Toreon, 36 anyos, human kini nasuko sa mag-asawa kay giyab-an og tubig-ulan ang ilang balay.

Personal nga nahinabi sa Banat News ang biktima kinsa mibutyag nga igo ra silang nagsawod sa tubig gikan sa ulan nga mitulo sa ilang atop atol sa kusog kaayo nga ulan sa milabay'ng gabii.

Sa wala'y laing intensyon, giyabo sa magtiayon ang tubig nga nasawod didto sa balay sa suspetsado kinsa nasuko dayon kay nagtuo kini nga ihi ang ilang giyabo. Nagkalalis ang silingan apan na-areglo ra kini dayon.

Wala damha sa magtiayon nga samtang nanglaba ang asawa nga si Rosalie kalit lang nga misulong si Toreon ug gibusdakan kini og baldi. Sa pagkahumod sa iyang asawa, wala mapugngi sa biktima ang kaugalingon ug gisukmag niini si Toreon.

Apan kusganong gibitad sa suspetsado ang biktima padulong sa iyang panimalay ug didto gitigbas pinaagi sa usa ka tayaon nga sundang.

Nahidangat sa Cebu City Medical Center ang biktima tungod sa grabing samad tinigbasan.

Mapasalamaton ang biktima nga habulan ang nagamit nga sundang sa pagtigbas didto kaniya. Samtang gibalhog na sa presinto ang suspetsado.