Abandonadong balay 'gisunog'

Abandonadong balay naugdaw human kini gituohang gituyo og sunog sa igsuon sa napatay sa tagbalay diha sa Barangay Olango, Aloguinsan niadtong Sabado sa buntag.

Base sa taho gikan sa kapolisan ang balay gipanag-iya sa usa ka Feliciano Pantonial kinsa nagtingkagol karon sa prisohan gumikan sa pagpatay sa usa ka Cornelio Delica, apan ang maong balay giabandon na sa banay niini.

Ang anak ni Pantonial nga si Jecelyn,20, maoy mitug-an sa kapolisan sa hitabo ug nagduda nga ang igsuon ni Delica mituyo og sunog niini sanglit niadtong gilubong na si Delica gisuwayan kini og sunog sa mga kabanay sa napatay sa iyang amahan.

Hinuon wala pay natumbok ang kapolisan kung si kinsa sa banayng Delica ang ilang gidudahan, samtang wala pa usab matino ang danyos sa maong sunog.