Limotan lipay nga nadakpan

Nalipay pa hinuon ang dinakpang tulisan nga si Eric Jay "Danny" Limotan nga siya nadakpan sa kapolisan kay matud pa niya mahunong na unya ang pagdaghan sa mga kasong sa iya ipasangil.

"Mayra sad nadakpan ko, kay kun wala pa magsige man og karga ang mga kaso sa ako bisan wala ko mihimo, pero wala koy reklamo sa mga tawong mitumbok nako kay natural naman sa mga tawong matiunan og armas nga maratol, aron makabawos magpataka nalang og tudlo og tawo kay ilado naman ko," asoy pa ni Limotan sa Banat News.

Sumala pa ni Limotan sa Banat News mibuwag siya sa grupo ni Torres niadtong gipatay ni Torres ang babayeng nagdala sa payroll diha sa Barangay Paknaan Mandaue niadtong milabay'ng tuig tungod kay gidukol siya og armas sa ulo gumikan sa pagkagar sa ilang motorsiklo.

Nagkanayon si Limotan walay klaro sad ang binahinay sa kwartang matulis kay bisan ang mga uyab ni Torres bahinan og tag P30 mil samtang sila ginagmay ra, kanunay sad istrikto ang lider kanila ug mangangkong dakong bahin sa ilang matulis adto paingon sa ilang "boss," wala usab siya masayod kun si kinsa ang maong "boss."

Dugang pa sa ilang gikainitang duha mao ang pagduda ni Torres kaniya nga iyang giiring-iring ang uyab niini sanglit kanunay nga silang duha lang sa babaye ni Torres ang mahibilin sa ilang hideout.

Matud pa ni Limotan mibalik siya sa grupo dihang ilang gitulis ang East West Bank diin gitawgan kini sa kauban nilang nailhan lang sa ngan nga Wengweng kay nagkinahanglan si Torres og dugang tawo sa maong operasyon ug gipasaligan ni Wengweng nga dili sila duolon ni Torres kay magpaabot lang man silang duha sa gawas.

Gipanghimakak ni Limotan nga duna na siyay kaugalingon grupo ug maoy mitulis sa P2 milyones nga payroll money diha sa A.S. Fortuna dakbayan sa Mandaue niadtong nakalabay'ng buwan kay matud pa niya nagtago-tago na siya sa Bukidnon sukwahi sa pasangil ni Torres ug sa kapolisan.

Show comments