Ang pagpamusil nahitabo didto sa barangay Poblacion sa lungsod sa Compostela sa miaging Domingo sa kaadlawon.
Ang mga biktima mao sila si Rolando Padilla, 19 , Mark Reyes, 18 ug ang manghod niining si Marlon Anhony Reyes, 18 nga pulos ulitawo ug mga nanimuyo sa maong dapit.
Ang nagpusil sa tulo ka biktima mao usab ang tulo ka wala hiilhing lalaki nga nagsakay usab og motorsiklo nga yamaha kinsa dali kaayong nakasibat pahilayo sa maong dapit nga maoy hinungdan nga napakyas ang mga polis sa pagsikop.
Ang mga silingan nga nahigmata sa maong pagpamusil maoy dali nga nakatabang sa mga biktima ug ilang gihatod ngadto sa Vicente Sotto Memorial Medical Center (VSMMC) sa dakbayan sa Sugbo.
Si P02 Pedro Borinaga sa kapolisan sa nahisgotang lungsod nga usa sa mga mitubag sa maong alarma ang miingon nga naglakaw lang pauli gikan nga nagbilar sa namatay nilang silingan ang mga biktima.
Matud pa niya nga gipamusil ang mga biktima sa makadaghan nga higayon sa duha ka wala hiilhing mga lalaki kinsa nag-atang na daan sa hilit nga lugar sa nahisgotang barangay sa lungsod sa Compostela.
Sumala pa ni P02 Borinaga nga dali kaayo nilang natubag ang maong alarma ug dali nilang gihimoan og pakisusi ang maong hitabo didto sa nahisgotang dapit.
Dugang pa ni P02 Borinaga nga ang duha ka wala hiilhing mga mamumuno sa tulo ka biktima ang dali kaayo nga miangkas sa nagpaabot sa unahan nga usa ka yamaha nga motorsiklo nga gidala usab sa wala hiilhing tawo nga gituohan nga kuyog usab sa namusil nga duha ka wala hiilhing lalaki.
Si P02 Borinaga miingon nga ang anggulo sa panag-atbang sa fraternity mao karon ang usa sa mga anggulo nga ilang gituohang maoy mga hinungdan sa maong pagpamusil sa maong dapit.